無綫重頭劇疫境延遲拍 鍾嘉欣望準時歸「加」
無綫多個重頭劇因疫情而延遲開拍，演員馬國明、鍾嘉欣、張寶兒及陳山聰雖已做足功課，但仍等待開工。鍾嘉欣有信心劇集會按時完成，讓她返加國陪仔女。至於馬國明笑言等開工沒有忙拍拖，反而看多了電影及做運動，為開工做好準備。
無綫目前有多部大製作新劇等待開拍，包括馬國明、鄭嘉穎、鍾嘉欣合演的《兒科醫生》；馬國明、唐詩詠、胡定欣、張曦雯等合演的《白色強人2》；李施嬅、陳山聰主演的《金宵大廈2》。雖然全部演員已經候命多時，睇晒劇本做足功課，不過礙於新冠肺炎確診個案每天還有雙位數字，而且禁聚令仍然實施中，故不少拍攝工作受到影響，除了改為全室內及電視城內取景外，很多劇集都因場地問題而一拖再拖，未能如期開拍。
馬國明閉關做功課
原本《兒》劇定於7月開機，因疫情延遲至今還未完全開拍。馬國明本來拍完此劇再拍《白2》，現正放假的他被問到是否有更多時間與女友湯洛雯拍拖，他說：「我呢排都忙做功課，有好多準備工夫，梗係唔係成日拍拖啦！延遲都好嘅，起碼有更多時間準備。」問到會否有其他工作因此而受到阻延？他說：「經理人都話幫我接咗啲嘢，之後會拍，對我嚟講冇乜影響。而且之前我多做醫生角色，今次轉去小兒外科，所以有好多功課要做，又要上堂，依家真正閉關做功課。」
鄭嘉穎日前秘密到電視城與高層杜之克、監製等為《兒》劇拜神，他接受無綫娛樂新聞台訪問時，坦言大仔平時很黐他，所以今次開工數月，都擔心對方不認得他。而專程返港拍劇的鍾嘉欣，被問到會否因延遲拍攝而拖慢返加拿大陪仔女，她說：「最重要都係每個人都安全，我哋仍然打算按時完成這部劇。」張寶兒亦說：「冇辦法，大家都想放心啲，所以延期。」
《白2》監製羅永賢說：「應該要延遲到11月頭先開到，都要等馬國明拍完《兒科醫生》先，但我哋都唔會咁快返大陸拍外景，最快2021年初先返去。」
另外，忙於拍攝《超能使者》的陳山聰原先緊接拍《金宵2》，但現時最快都要8月底才開拍，他說：「我未收到監製通知要延遲到幾時，其實對我嚟講都係好事，等我可以多啲時間消化吓個劇本同休息一下先。」