陳爽露營捱苦靠細路呵番

藝人陳爽最近為免費電視77台香港開電視主持露營節目,跟露營達人學習紮營技巧及野外煮食,她笑言做女兒的時候凡事都有人代勞,做人阿媽就事事親力親為。拍攝期間,她要日曬雨淋又被蚊叮蟲咬,最後要同行小朋友鼓勵她這位露營初哥。

因疫情關係,大家暫時未能到外地旅遊,不過沒關係,本土也有很多遠離塵囂適合露營的好地方,讓大家望梅止渴。由藝人陳爽與林子博主持的露營節目《5個星星的晚上》將於本月22日起,逢星期六晚上九時半在免費電視77台香港開電視播出。

兩人分別跟五個家庭一齊露營,展開一段親子的大自然之旅。陳爽自認露營經驗寥寥可數:「我喺加拿大讀書時試過,當年後生啲,同一班後生仔女一齊,女仔好多嘢都唔使做,只係執吓嘢、擺吓餐枱,但依家身份唔同咗,作為兩個小朋友嘅媽咪,母親角色好重要,好多嘢要自己做,今次係好難得嘅學習機會,我要落手落腳去紮營,由完全唔識到搞得掂,又要喺營地煮嘢食。」

偷師學育兒

陳爽表示跟她一齊參與拍攝的家庭都是露營達人,連小朋友都很專業,她笑說:「其中一個家庭擁有自己嘅營地,小朋友有幫手打理,記得拍攝時朝早好曬,夜晚好多蚊,間中仲會落雨,都幾辛苦,小朋友反而會鼓勵我。」陳爽稱今次拍節目獲益良多,除了學到不少露營知識外,還學懂育兒心得:「我嘅小朋友同其中兩個家庭嘅小朋友年紀差不多,佢哋好勇敢、獨立、勇於表達自己,呢樣係我好羨慕,希望從中取經,睇吓父母係點教導子女。其中一個家庭,父母好堅持每星期都要去露營,想畀小朋友探索大自然;另一個家庭就好着重煮嘢食,小朋友連洋葱、蒜頭乜都會食,呢個都啟發咗我,唔應該避開小朋友唔食嘅食材,而係要不斷鼓勵佢哋,而且去到營地唔食就冇得食。」而陳爽的小朋友也有到現場探班:「佢哋都好興奮,乜都想幫手,所有嘢都有體驗過,令佢哋明白到唔係乜嘢都現成有,而係要自己動手做。」

林子博父子兵上陣

另一位主持林子博帶同囝囝一齊拍攝,他笑言感覺非常奇妙:「我對上一次去露營仲係讀中學,十五、十六歲左右,今次再去已經係帶埋自己十歲大嘅小朋友,好似跨咗一個年代咁。」

子博稱對其中一個父子家庭印象特別深刻:「個小朋友一歲幾開始就由爸爸帶去露營,其實個爸爸都幾攞苦嚟辛,不過佢想將來同個仔有個難忘回憶。」他稱這些家庭都是一群不願意讓社會牽着鼻子走的人:「佢哋唔想喺手機充斥嘅年代,由手機陪伴個小朋友成長。今次嘅經驗對我嚟講都幾特別,作為一個城市人,好少會去郊外露營,仲要大熱天時又要餵蚊。」

《5個星星的晚上》

播映日期:8月22日起,逢星期六晚上9:30播放

頻道:免費電視77台 香港開電視