惠英紅煞科獲歡送眼濕濕示愛
影后惠英紅再演無綫劇，與台前幕後培養出真感情，加上今次角色十分有挑戰性，難怪她日前順利完成所有戲份後，一時感觸眼濕濕，且向拍檔們高呼「我好愛你哋」！
惠英紅早前忙於趕拍無綫新劇《刑偵日記》，戲中她患有人格分裂症，拍攝期間情緒起伏可想而知，她施盡渾身解數全力演出，並獲一班好拍檔包括黎諾懿、王浩信等配合及支持，台前幕後合作愉快。日前她完成自己的戲份，宣布提前煞科，當晚其他演員即使不用拍攝，亦紛紛現身跟她道別，並由監製關樹明代表獻花以表心意，搞到惠英紅感動非常，發言時一度眼濕濕。
當惠英紅完成最後一個鏡頭後，即在戲中兒子王浩信攙扶下，站上木箱向眾人發表感言：「親愛的，今次同大家合作相當愉快。我可能有好多歇斯底里嘅戲份，令到大家覺得難受，希望你哋唔好介意。有時我有少少脾氣，但想大家明白我好愛你哋嘅……今次大家好團結呀！」據悉惠英紅因有其他工作在身而提早離隊，幸而獲劇組諒解，盡量遷就檔期。
黎諾懿讚劇組團結
黎諾懿相隔10年再與惠英紅合作，他說：「其實今次拍《刑》劇遇到唔少問題，例如疫情停工及劇組曾有懷疑個案咁，好多時要臨時作出改動，但大家好團結，我諗紅姐（惠英紅）感動嘅原因係覺得大家好齊心咁去完成咗一件事。今次佢扮演精神病患，好多時要培養情緒，一入戲就唔想有枝節，所以大家企喺旁邊等，唔想打擾佢，加上佢煞科嗰晚好大雨，大家都落力繼續拍攝，難怪佢咁感動。我都同佢講，希望下次我哋再合作，唔使再等10年咁耐。」