吳沚默半年冇嘢撈搵社工陪喊
被喻為「文青女神」的吳沚默（Momo），早前連開無綫三部新劇《刑偵日記》、《BB大晒》及《一笑渡凡間》，工作相當忙碌，幾乎連瞓覺都冇時間。穿梭三劇，角色轉來轉去，挑戰性甚高，Momo亦樂於接受挑戰：「三個劇嘅角色都好唔同，個個我都好鍾意同拍得好投入，記得拍《一笑》嘅時候，我個角色都幾慘，試過拍一場喊戲，cut咗機我仲繼續喊，導演都嚇一嚇。」
除了拍劇，Momo早前還出書，事業看似一帆風順，但事實卻不是。她去年曾有半年時間冇工開，收入銳減當然難捱，但最大問題是喪失自信心，她說：「喺無綫有份底薪，所以經濟唔係最大問題，反而嗰個時候失去咗希望，真係好迷惘，好彩當時同個女仔一齊住，佢係社工，有日我問佢可唔可以同佢傾吓，我同佢講，我冇嘢做，覺得冇人想睇我做戲……」說到此處，Momo即感觸哭起來：「點知我講完，佢即刻喊。佢話覺得好傷心，因為一個鍾意拍戲嘅人覺得冇人想睇佢做戲，係一件好難受嘅事，佢戥我好心痛！」Momo邊說邊哭，之後要停一停，才能說下去：「我好多謝佢陪我度過嗰一段時間。」
遇「渣男」潛水又劈腿
除了曾遇事業低潮，原來愛情方面，Momo都曾經遇「渣男」，受過愛情重傷：「記得啱啱大學畢業嘅時候，第一次同一個已經喺社會工作嘅男仔拍拖，一齊咗冇幾耐，已經發覺佢好少搵我，我當時同自己講，可能出嚟社會做嘢嘅人係咁，點知等咗3個禮拜，有一晚深夜頂唔住打畀佢，點知係個女仔聽，令我終於明白發生咩事。」發現男友一腳踏兩船後，她最終決定分手：「我喊咗好幾日，但喊完、痛完就算，唔會再浪費時間去諗。」