廖慧儀抄馮盈盈姣嗲洪永城出埠
有「狂野空姐」之稱的候選港姐廖慧儀，在網上直播公然挑逗洪永城，嗲住問他有否對空姐有Fantasy，又公然叫對方帶她出埠，姣勁十足！
《2020香港小姐競選》「我和港姐有個約會」昨晚3位佳麗是「狂野空姐」廖慧儀、黃婉恩及源菲然，與她們同枱的分別是洪永城（Tony）、郭子豪及馬貫東。Tony一開始已指廖慧儀眼神迷人，對方亦交足戲，嗲聲嗲氣問：「咁你有冇對空姐有Fantasy先！」、「你鍾意外國人夠大喎……隻眼」、「希望你帶我去旅行啦！」甚具挑逗性。Tony指她直認拍過5次拖，她又嗲爆說：「係囉！我唔識講大話，係缺點嚟！」其後二人度手掌，大手板的廖慧儀自言平時多做伸展運動，之後無端端說：「男仔應該做多啲！」拗手瓜時又嗌：「好大力呀！Oh My God！」連Tony都覺得難頂：「你咪講呢啲呀！」網民指廖慧儀有心扮言談Open的師姐馮盈盈，她說：「我做番自己啫！（話你姣？）喺洪永城身邊忍唔住笑，所以畀人咁嘅感覺，女仔好易畀人誤會，好唔公平囉！」
黃婉恩驚畀男友飛
與馬貫東同枱的黃婉恩有一位拍拖7年的男友，但未有意結婚，被問揀港姐冠軍還是男友，她揀冠軍：「我諗返屋企男友會打我，可能會同我分手！」而源菲然自言喜歡大隻男，問郭子豪是否啱心水，她說：「啱，我鍾意陽光同大隻。」但郭子豪當面請她食檸檬：「唔好意思，我有女朋友。」另一批入圍佳麗郭柏妍、梁懿婷等昨晚預錄，梁懿婷表示過往頗多性感打扮：「今次係自己衫，都係舒服健康為主。」