JW唔恨做一姐打視后主意

入行10年的歌手JW，昨日在將軍澳電視城出席加盟星夢娛樂記者會。除了公司高層何哲圖在場，無綫高層杜之克和余詠珊更送上金咪祝賀，多位無綫劇集監製亦現身支持，JW直言希望有機會唱劇集主題曲和嘗試拍劇。此外，JW一班同門歌手菊梓喬、胡鴻鈞、連詩雅等均有到場支持。

結婚生B不棄事業

JW被問到過檔是否要做「一姐」？她說：「唔係，冇諗過要做一姐，只係希望利用呢個平台作出唔同嘗試，入行10年，好想試吓唱劇集歌同拍劇，之前客串過《逆天奇案》，希望之後可以演戲份較重角色，唔一定係女主角。（『視后』做目標？）慢慢開始、鍛煉，當然做咩都希望做到最好。（簽咗好多年『賣身契』？）幾年啦，轉會費同各方面都幾好。（今年攞『最受歡迎女歌星』？）儲多啲歌先，過程比獎項重要。（公司多女仔多是非？）冇諗咁多，專心工作做好自己就得。（取替吳若希？）當然唔會，佢依家大肚，佢係好偉大和值得尊重，正如我將來結婚生B都唔會放棄唱歌，呢度平台夠大，可以容納好多人。（合約講明生仔要通知公司？）如果有呢個決定都會同公司溝通，呢個係責任。」

菊梓喬不認同有勁敵

而星夢「一姐」菊梓喬被問可是遇上勁敵？她說：「唔係，公司冇分，好開心佢加盟令到公司嘅實力增強，希望佢唱多啲家喻戶曉嘅金曲。（分薄咗攞金曲金獎嘅機會？）冇分薄，因為我都未攞過金曲獎。（力保女歌手獎？）今年JW攞啦，冇所謂，希望佢有更好嘅成績。」