做護士被抽水何孟珊唔想識醫生
《2020香港小姐競選》「我和港姐有個約會」昨晚網上直播，候選港姐何孟珊及陳煦凝（Amber），跟嘉賓丁子朗、黃庭鋒分兩組共進晚餐。何孟珊自爆當年做護士時被醫生掃膊「抽水」：「醫生全部結晒婚，不過有啲結咗婚都會想識女仔。（會點識？教做手術？）係身體接觸。」隨即伸手掂丁子朗膊頭，續稱：「之後我避開佢，唔跟佢去巡房。（醫院好多靚女護士？）可能我新嚟新豬肉，點解咁對我？我做咗8個月，辭咗職！」
至於被傳鼻及下巴均整容的Amber，無奈表示已澄清很多次，還叫庭鋒即席搣其下巴，以證真材實料，她說：「整係硬，我係軟，細個下巴都係凸，親戚都話覺得我下巴係整。」
直播後，兩女齊齊受訪，Amber繼續否認戀情：「個男仔係我Best Friend，唔會拍拖，想專心比賽。（鍾意咩類型男仔？）鍾意醜嘅男仔，太靚仔令我覺得佢一定係自細被當王子咁照顧，因為我鍾意被人照顧。」而何孟珊被問遭醫生非禮是否感難受？她說：「都係一次，其實佢幾出名。（醫術出名定係抽水出名？）各方面都出名！其實眼見有唔少醫學桃色新聞，所以我都唔想識醫生。」
