劉穎鏇忍口減磅被爆偷食雪糕
藝人陳山聰、劉穎鏇（Tiffany）、陳展鵬及唐詩詠日前為無綫新劇《超能使者》於電視城開工，拍攝一場時間停頓報復戲份，期間要出動美色的Tiffany，既露腰又騷腿，非常養眼，之後更被山聰抱走。
平日有玩開健身的山聰，面對身形高挑的Tiffany也應付自如，他笑說：「全TVB最高大同最重量級嘅女演員畀我抱起！不過佢為呢套劇好努力減磅，日日見佢食雞胸，有時都覺得陰功，不過佢都試過夜晚叫我陪佢買消夜。」Tiffany坦言面對美食當前，加上經常食白烚雞胸，故偶爾想獎勵自己，她說：「試過買燒賣同腸粉，仲要落好多醬，好好味！」山聰聞言即踢爆她試過半夜買雪糕及薯片，令Tiffany不懂招架：「試過一次咋！你仲好講，話陪我一齊食薯片，點知食一塊就唔食，最後要我食晒！」