林凱恩不求富二代等真愛捱窮

同屆四散 孤軍作戰

林凱恩2015年參加香港小姐競選奪得「友誼小姐」後，加入無綫成為演員，短短五年間已拍過劇集《她。她。她的少女時代》、《降魔的》系列等，近年更憑劇集《愛‧回家之開心速遞》譚育英一角人氣急升。與她同屆的三甲港姐麥明詩及龐卓欣等，相繼離巢轉行發展，現時只留下她一人孤軍作戰，她說：「感覺好特別，因為每一屆港姐都會有一班人入TVB，變相好似大家都喺呢個圈互相扶持，但我依家身邊一個又一個嘅戰友離我而去。不過變相又係一件好事，因為如果大家都仲喺娛樂圈，就變咗競爭對手，我同其他佳麗都仲有聯絡，會成日約出嚟，依家大家只係純朋友關係，是非又少啲。」

欣賞阿佘 出神入化

短短幾年間已拍過不少劇集，更憑《愛》劇成功入屋，對比其他新人，上天似乎特別眷顧Iris，她也非常珍惜任何機會：「我都唔係一嚟就有好重戲份嘅角色，好感恩大家畀機會我，覺得TVB係一個木人巷，畀到好多機會我練習。雖然我冇認真去報讀戲劇課程，但我真係好認真去睇多啲戲，研究人哋點樣去演繹角色；我亦有練習咬字，同埋練氣等自己冇咁雞仔聲。（有網友睇好你做佘詩曼接班人！）唔敢當，以前嘅前輩勁啲，競爭更大，我已經好幸福。我覺得佢好叻，無論咩角色都能夠做到出神入化，我會視佢為學習目標。」

事業起步 戀情空白

事業漸有起色，然而愛情卻暫未有着落，早年與阮政峰傳出緋聞，最終卻不了了之。在《愛》劇與「金城安」周嘉洛打得火熱，現實中就Dry了兩年，Iris把感情事交了給緣分：「一直都等緊真命天子，希望佢快啲搵到我。（擇偶條件？）對我好、專一，畀到安全感我，最緊要係錫埋我媽咪。（將來婚後會同媽咪住？）咁又唔會，因為相見好同住難，做中間人好辛苦，所以我可能會盡量搬近媽咪，同一個區或屋苑就最理想。」

自言暫時未有追求者的她，拒絕與富二代拍拖：「千祈唔好，我唔需要另一半好有錢，我鍾意一個人唔會理佢嘅背景，就算要我同佢捱窮都冇問題，最緊要係有目標，大家一齊去努力，更何況我份人好貼地咋，唔係好大使，所以同我拍拖唔使用好多錢。（好易養起你？）係呀，同我手拖手行公園，又或者一齊跑步做運動，已經好開心，不過暫時未有人追，惟有努力工作先啦！」