新冠肺炎疫情持續，正當全球呼籲保持社交距離之時，美國唱作鄉謠男歌手Clayton Gardner日前表演期間卻遭狂迷上台騷擾，對方更拉住他，近距離對着他喪咳，嚇窒全場！
過往有不少狂迷騷擾藝人事件，不過以新冠肺炎作威脅卻是新鮮事！來自德州的男歌手Clayton上周五在家鄉Las Colinas開騷，大會安排觀眾保持社交距離，但表演期間，一名女狂迷突然上台走近Clayton，無視勸告賴死唔走，最離譜是竟然捉住Clayton並對住他咳嗽！
Clayton事後在社交網上載事發經過的短片，發文：「呢條片段係嚟自上周五喺Las Colinas舉行嘅演唱會。好美麗嘅一夜，係戶外騷，大約有30名觀眾喺社交距離下享受現場音樂，我喺社交網開直播，同更多Fans分享。表演咗大約15分鐘嗰陣，呢個唔知乜水嘅女人突然喺我身後出現，我多次請佢離開，但佢扯住我條頭巾，仲向住我喪咳，我盡可能咁耐心處理呢件事。為咗保護3歲嘅女，我由疫情開始已經保持安全衞生習慣，亦喺社交場合保持距離。喺呢幾秒鐘內，呢位女士喺我身上奪走晒所有嘢！」他坦言對狂迷的行為感到憤怒，而現場觀眾與他同樣震驚：「我寧願留喺屋企，但係我要演出搵生活費。」他透露該名狂迷之後有道歉。
另外，荷里活再有藝人確診，《完美巨聲幫》（Pitch Perfect）37歲美國女星Anna Camp在社交網宣布不幸中招，透露目前失去嗅覺、味覺，並上傳一張戴口罩的自拍照，呼籲大家戴口罩防疫。Anna表示病了三個多星期，沒想到只因一次在公共場合沒戴口罩就受感染，又留言：「有人話新冠肺炎好似感冒，但呢個同感冒時嘅狀況唔同，感染病毒後，冇人知道佢會對身體嘅免疫系統造成咩傷害。」並透露持續出現頭暈、疲勞、胃部不適、惡心、嘔吐及發燒等其他病徵。