蔡潔獲猛人關照改寫命運

影響蔡潔的人便是著名內地演員張鐵林，蔡潔笑言：「因為我入讀廣州暨南大學導演系嘅時候，張鐵林係院長，佢同我哋接觸得好密，教咗我哋好多嘢，尤其係一啲實戰嘅製作，記得我Year 3嘅時候，跟咗佢去睇《鐵齒銅牙紀曉嵐4》，當時楊千嬅都有份演出；亦試過零下十幾度，我孭住師傅嘅書包，就咁企咗一日，當時着咗雪靴都覺得隻腳凍，要搵膠袋封實個靴口先好啲。」

視李佳芯為模範

張鐵林外表威嚴，蔡潔坦言起初也心生畏懼：「真係會怕(O架)，好多人話我斯文、內向，但嗰陣時我再靜同再內向十倍，回望番都覺得好神奇，竟然考到入導演系，院長有份揀我，當時廣東省只係收兩個學生，真係好開心，改變咗我嘅人生！」

談到她演出的首部電影，裏面有一場與曾志偉超激的床上戲，需裸背演出，對於蔡潔來說，真的是一次極大的挑戰，現已沒勇氣再接這類電影：「當時真係用咗幾百分勇氣去拍，無悔嘅，行過嚟嘅每一步，我都好感恩。（有唔少網民話你同李佳芯撞樣，會唔會都想好似佢咁好成績？）Ali好斯文，亦係一位超級優秀同好努力嘅演員，係我其中一個模範，我會學習佢嘅努力，但對於成績如何唔敢諗太多，始終係啱啱開始。」

伴侶可遇不可求

曾於選美比賽奪冠的蔡潔，當然不乏裙下之臣，曾經拍過兩、三次拖，笑言每次談戀愛都很難忘。談到擇偶條件，她表示：「我認定咗演藝係自己嘅畢生職業，所以，要搵番啱嘅另一半，會支持我，不過都可遇不可求。」