揚言幫網民「打包」湯寶如失言遭圍剿

藝人湯寶如現身好友麥長青（麥包）的新店，並將合照上載社交網送祝賀，有網民留言以為新店「賣包」，怎料湯寶如竟回覆：「係呀！同你打包啊！」該網民感不滿，追問：「我講錯嘢開罪你咩？」湯寶如自知鬧錯人，補鑊說：「沒有！沒有包賣的！」但不少網民都看不過眼，留言加入戰團：「嘩！人哋一句以為賣包，就話同人打包，惡到咁，公眾人物就收斂吓啦。」事件一發不可收拾，並牽扯到政治取向問題上。

呻遭網絡欺凌

湯寶如即時將留言數量設定上限，望平息風波，再發文：「每個人也有自由言論，有些人挑釁和你不同思想的人。是甚麼道理！網絡欺凌是一件可悲的事，疫情已經愈來愈嚴重，仲要講政治！可悲！」並轉載一系列網民留言的Cap圖，表示：「本人保留一切法律權利！造謠。」

「講番唔好意思」

本報聯絡上湯寶如，她表示有些圖被刪除或改圖，已交由律師處理：「其實只係講吓笑，但網民以為我鬧佢，我都有即刻答番佢話唔係。我只係想畀佢知，麥包嗰度真係冇包賣，係一句完全冇惡意嘅說話，不過我之後對嗰位網民嘅留言都畀人刪走咗，然後再被人無限放大。如果令到嗰位網民有所誤會，我都要同佢講番唔好意思。至於其他人寫嘅嘢，我就唔回應喇！」

而麥長青則希望以和為貴：「冇乜大問題，嚟得支持都係我好朋友，嚟得嘅都係顧客，感激大家。（擔唔擔心影響生意？）呢啲我控制唔到，唔想刻意講啲乜嘢。」