馬浚偉黎瑞恩 約定歸隱做神農氏！
藝人黎瑞恩（小恩子）首演舞台劇，更包埋伙食，令「老闆」馬浚偉大為感動！他們自爆「生活豬事」笑不停，又約定日後開農場耕種，馬浚偉更希望化身神農氏，退休過隱世生活！
黎瑞恩（小恩子）與馬浚偉合演舞台劇《男人40 CEO》，投入綵排個多月，台前幕後打成一片。小恩子每日貼心負責拍檔的膳食及湯水，更派發印有各人名字的暖壺作為小禮物，馬浚偉說﹕「佢知我獨資今次演出，就同我講要『包三餐』減輕我嘅負擔。我話一人一餐啦，佢點都唔肯，即使有時唔使綵排，都會幫我哋叫到成枱嘢食，試過有次啲嘢食逼爆雪櫃門，自動彈開咗！」
自揭瘀爆「豬事」
馬浚偉坦言欣賞小恩子生活貼地：「佢好『放低身段』，試過助手接唔切電話，佢就自己拖住個大篋、拎住大袋衫同湯煲出現喺我哋面前。」小恩子收取的酬金早已「使凸」，她卻開懷笑說：「當交學費學嘢囉！我從未演過舞台劇，而對手都係咁有經驗嘅劇界演員，覺得一齊食飯可以親切啲，多個人、多雙筷啫，平日都好鍾意請人食飯。」
小恩子劇中飾演「豬秘書」，談到過往的「豬事」，她即笑說：「試過喺街見到個男人好似舅公，我走埋去打招呼，對方一臉愕然，好驚咁，後來我終於知道認錯人！」馬浚偉笑言亦有類似經驗：「行行吓街有個男人好熱情咁同我打招呼，我認唔出佢，以為係舊同學或舊街坊，所以停低傾偈，直至佢話：『真係好耐冇見你……喺電視出現』，我先知大家素未謀面！又試過之前撞番以前一齊參加歌唱比賽嘅女仔，我哋曾經好熟，不過見番我竟然毫無印象，有啲尷尬。」
顧住睇戲甩對白
今次演出舞台劇，馬浚偉將接受「終極挑戰」，扮米高積遜跳勁舞之餘，又會偕小恩子跳國際標準舞，落力為觀眾帶來驚喜。至於小恩子表示仍在努力記對白：「要背熟到可以丟劇本落垃圾桶，不過依家綵排睇到其他人嘅演出，會當咗自己係觀眾咁哈哈大笑，忘詞同唔記得輪到自己講對白。」兩人笑言有意將「緣分」延續到務農方面，約定日後開農場預埋對方，馬浚偉說：「去到某個年紀，相信會退居幕後，搵塊田種吓嘢、幫病人把吓脈，效法神農氏囉！」