譚嘉儀包面變尖 激似陳秀珠
歌手譚嘉儀近年歌、視事業起飛，竟然愈忙愈靚？初出道時的「包包面」近日進化變「刀削面」，蘋果肌加V煞下巴，網民指她激似無綫昔日花旦陳秀珠！譚嘉儀笑言因貪心落錯Filter而變臉。
入行9年的譚嘉儀（Kayee）近日五官變化頗大，變得標致過人，被指愈來愈似年輕時的陳秀珠，惹來網民熱議。Kayee對此笑言開心有人討論，但否認整容：「睇到呢啲新聞覺得好得意，之前都覺得自己五官好肥，真係成個包咁。嗰時勁Baby Fat，近呢兩年做好多運動，同埋成日做Facial碌面，做啲緊緻療程。」
用自動瘦面App
問到是否非常落本做美容？她說：「OK啦，我覺得做藝人係要花啲錢，我哋成日出嚟見人，都想皮膚好啲，要定期做Facial清潔。（你有冇整容？）梗係冇啦！有啲相落咗Filter勁得滯，我認我落錯Filter，貪心咗，影相用咗啲美顏App，一用就自動瘦咗，我冇為意，就咁甫上網。」
「整容好難有定義」
她坦言不擔心被指整容，但直言現時整容很普及，她說：「我就唔會去試（整容），因為覺得做運動都可以瘦面，做瘦面機都夠。其實整容好難有定義，譬如脫咗粒癦，咁算唔算整容呢？或者紋眉、紋眼線，嗰啲又算唔算整容呢？我覺得最終目的係想個樣健康啲、靚啲。（覺得自己似陳秀珠？）睇睇吓都有啲似，我都想搵珠姐影番張相。（識唔識陳秀珠？）佢好靚，好開心啲人講我似佢。」又指之前用美顏機瘦面專攻下巴，一星期會碌幾次，笑言以後會「碌少啲」。