黎諾懿急停工 隔離妻兒

施匡翹昨日確診新冠肺炎，掀起娛樂圈恐慌！曾與她一齊上戲劇班的游嘉欣有可能受感染，並一度誤傳中招。昨日有份參演無綫新劇《刑偵日記》的她得知消息後，即刻停工並進行檢疫測試。

「擔心唔嚟」

昨日與游嘉欣一齊拍《刑》劇的黎諾懿，受訪時表示暫時不能與太太及兒子共處：「劇中我演警察，游嘉欣同我哋同一隊，其他演員仲有王浩信、黃智雯同姜皓文，為咗安全，我哋個劇都要停，直至佢有報告出咗先至復工。（多唔多對手戲？）同一Team人囉，都擔心唔嚟，但為安全起見，今晚太太同囝囝都去外母度住先，今日開工個實景都做晒消毒！」而姜皓文表示：「未太了解，我下午收咗工，唔太擔心，但屋企有太太喺度，我依家去醫院Check咗先。」而該劇監製關樹明表示需要停拍，待游嘉欣的檢疫報告有結果，才另定開工日期。

戴祖儀驚染疫

至於有份拍《刑》劇的戴祖儀曾與施匡翹一齊上戲劇班，她受訪時表示：「我依家都喺醫院等緊驗，心情複雜，好擔心！」至於戲劇班老師兼演員鄧智堅表示要暫停授課：「我依家冇唔舒服，公司都會安排所有學生做測試，學校亦會徹底消毒。（擔唔擔心？）都要面對，呢排我會自我隔離。」另外，無綫新劇《七公主》演員黃翠如、鄺潔楹和李豪等昨日於廠景拍法庭戲，亦要提早收工，李豪於社交網留言：「由於疫情嚴重，拍戲中的我們提前下班，晚安，好好休息加強抵抗力。」