莊思敏冇戴罩街坊鬧爆
疫情再爆發，莊思敏、莊思明、楊明、曹永廉等繼續有工開，昨日在沙田隆亨邨為新戲《時代》進行開鏡儀式，現場演員、工作人員、傳媒及圍觀街坊人數超過半百，多人聚集增加播疫風險，期間有警車巡視，3、4名警員先向附近屋邨保安了解，還登記其中一名工作人員身份，另有街坊大叫及向警察投訴表達不滿：「戴番口罩啦！好危險o架！」
問到莊思敏可有聽到街坊「訴求」？她無奈地說：「冇辦法！演員係比較敏感，埋位開工冇可能戴住口罩，打開電視機見到演員戴口罩都覺得奇怪，但一收工、放飯都會戴番。」又謂上星期開拍新戲，於禁聚令收緊之下暫無影響，亦密密開《姊妹淘》。而電影公司指事前有向警察公共關係科申請不反對通知書，故不涉違反禁聚令：「有居民投訴太多人聚集，警察嚟到只係調查同登記番我哋工作人員嘅資料，然後核對申請文件。」
思明爆楊明有「另一個」
情侶檔楊明及莊思明透露戲中沒感情線，前者演警察、後者演新聞主播，思明更酸爆笑男友有另一個，不過就零親熱戲，楊明即識做「備案」：「做戲啫！定啲嚟！原本聽日開工，但個場景未得。（需要停拍避『炎』？）暫時未收到呢個通知。（提到『時代』字眼怕唔怕敏感？）呢個係本身公司名嚟。」談及是次開鏡活動人數眾多，問到會否潛在危險？楊明說：「好似關室內事，室外同工作應該冇事嘅，而且我哋喺空曠嘅地方。（食肆晚上6時停堂食對你餐廳有影響？）首日實施有落灣仔分店，見啲食客都好自覺，搭正6點就走。」另外，講到莊思明近期相當「黑仔」，見其左手手(月爭)因炒車貼上大塊膠布，她竟樂觀地說只是皮外傷，希望8月順利考電單車車牌，不過楊明大叫肉赤：「要畀佢跌吓先知痛，自己小心啲啦！係小小教訓。」問到敢唔敢坐女友車？他即抵死笑說：「唔好喇啩！如果係三個轆嘅就OK。」
