李佳芯嫌爆炸頭趕姻緣最驚攝灶罅

李佳芯掟飛鏢，好眼界！

藝人黎耀祥、龔嘉欣及李佳芯等，昨日在將軍澳電視城宣傳劇集《殺手》，該劇首集錄得七天跨平台總收視最高29.6點，有193萬觀眾捧場。李佳芯的「爆炸頭」造型大受網民歡迎，她卻笑說：「觀眾好似鍾意同我唱反調咁，我愈話唔好，啲人就愈鍾意，我驚留呢個爆炸頭會嫁唔出！（男友唔鍾意？）唔係，冇問佢鍾唔鍾意，不過連陳豪都讚好，叫我保留呢個髮型。」她本來計劃在書展推出新書，惟書展受疫情影響要延期，她說：「諗緊變陣，本書下星期書局有得賣，簽名會就要等疫情好轉。（喺每本書送香吻？）我覺得好變態，我冇咁嘅自信，唔覺得啲人想收到！」

預告下月開新劇

有傳李佳芯因政治立場遭無綫「雪藏」，已年多沒拍劇，而《兒科醫生》（前名︰兒童醫院）角色更由張寶兒頂替，她指從未聽聞會拍攝《兒》劇：「自己聽過8月中會開新劇，已經見過監製，不過等佢哋公布。」她又否認購買西貢千萬獨立屋求轉運，但希望在兩年內置業。

龔嘉欣起飛腳退敵，好勇猛！

黎耀祥出拳打木板，嚇到江美儀皺晒眉。

至於黎耀祥與龔嘉欣劇中動作場面多多，近日播出救江美儀的戲份更拍了兩日，龔嘉欣說：「好多動作場面只係一、兩分鐘，但拍就兩日。」黎耀祥笑說：「拍得辛苦，但係自己有滿足感，我都打算進軍武行，我哋拍多套續集，打得再甘啲嘅，做雌雄大盜！唔知係咪啲幕後睇咗呢一套，下套《拳王》我又係做拳手，如果唔係疫情，我依家已經訓練緊泰拳。（要操得更弗？）要操啦！唔悶嘅，但係有啲後悔。」龔嘉欣笑指拍攝《殺手》時已摸勻黎耀祥的腹肌，大家還圍着他拍照，黎耀祥笑言好像變成動物園的動物任人參觀。