菊梓喬外賣獨吞六餸 何依婷開工捱飯糰
政府規定全港食肆每晚六時起禁止堂食，圈中不少家中冇飯開的藝人惟有靠外賣醫肚。獨居的菊梓喬花幾百元連掃幾個餸分幾餐食；何雁詩與鄭俊弘逼在車廂內開餐；陸詩韻打包邊爐食材，留在家中與家人共享；要開工的何依婷則要捱飯糰！
「星夢一姐」菊梓喬（Hana）平日都有買外賣的習慣，愛濃味食物的她特別喜歡食芥蘭炒牛雜、鮮魷炒豬雜等菜式，前晚不用開工的她說：「唔使排隊買外賣，基本上成條街都好似冇乜人，我去嗰間類似大牌檔嘅食店買外賣小炒。」瘦削的她自爆原來是大食妹，會叫五、六款小炒餸菜，笑說：「我真係食好多嘢，一日食三、四餐，所以買幾個小炒，食剩第二朝可以食。（食隔夜餸咁慳？）幾百蚊o架！求其炒碟嘢都要80幾元，但我人生最大娛樂就係食嘢，有時連續開幾日工，都想食番餐好嘛！」
何雁詩鄭俊弘車廂速食
至於何雁詩孖未婚夫鄭俊弘（Fred）前日在灣仔完成工作後，剛好過了六時，餓極的兩人即飛奔一間泰國餐廳買了三個小菜，但要在車廂開餐，何雁詩說：「我哋喺車度食晒，阿Fred揸車，我一路夾啲餸畀佢，紅燈就畀啖佢食。我哋好似好耐冇嘢食咁，本來係當下午茶，但食完都飽晒。」
陸詩韻打包邊爐料
而陸詩韻就叫邊爐外賣，覺得在家中進食最安全：「冇乜嘢都留喺屋企唔出街，疫情關係唔想媽咪同家傭姐姐去街市買餸，叫外賣返屋企打邊爐最舒服，啲嘢都好新鮮。」並坦言最近多了時間陪伴家人，有時間亦會整理家居。至於節目主持何依婷透露要趁開工前吃飯團頂肚，陳山聰則習慣帶私家飯開工，他說：「尋日喺廠拍咗一場就出外景，冇喺公司餐廳食，喺車度食完就開工。」