音樂人盧冠廷（LoLo）昨日率領環球歌手陳凱詠（Jace）、涂毓麟、文廸及Kerryta，擔任ViuTV音樂節目《Chill Club》嘉賓。提到日前與4位樂壇生力軍合唱《突破自我》，LoLo大感滿意，並點名讚Jace。問到可有被後輩邀寫歌？他笑言：「佢哋唔敢叫啦！睇吓佢哋進步成點先考慮。」
而文廸笑言自覺最獲LoLo疼錫：「咁啱我又姓盧，同姓三分親，覺得前輩特別錫我。除咗叫我食嘢，佢仲第一個向我介紹支天文望遠鏡。」問到可會邀LoLo寫歌？文廸即想出好橋說：「轉頭喺台上面問佢，前輩好好，佢會（應承）嘅。」
