高海寧飲幾啖即冧靠楊明打救

高海寧以型格造型現身，少了女人味，不過楊明就好欣賞。

高海寧（高Ling）、楊明、陳曉華及朱敏瀚等，昨午現身電視城宣傳新劇《迷網》。高Ling以絲質上衣登場，走路相當「跌蕩」，她卻嬌嗔說：「頭先畀楊明話男人扮女人呀！」楊明即笑謂：「我係話你女人扮男人，短髮啱你，好型呀！」高Ling也很喜歡這個髮型，只嫌Set頭有點難度，不過朋友建議她影輯相留念便好了，始終長髮較適合她。

談到今次拍《迷》劇難忘事，高Ling說：「有場戲講我醉酒，為咗入戲我真係飲咗幾啖，本身又唔係好飲得，結果出咗事，最終要楊明同工作人員送我返屋企。」楊明聞言無奈說：「佢前後飲咗4啖，起碼講咗『我醉嘞』百幾二百次，我就話尖沙咀（拍攝地）個個都知你醉咗嘞。」

原來早於高Ling前，已試過有女藝人在楊明面前發生同樣情況，他說：「嗰個直情醉到連戲都拍唔到，但我唔會開名。（女友莊思明好飲得？）係，應該係遺傳，佢成家都係咁。」

「喊包」陳曉華每日至少一喊，做佢男友要準備多啲紙巾。

演員空群而出宣傳，夠晒氣勢。

陳曉華瞓唔着都喊

至於陳曉華則透露該劇是她的「處女作」，戲中與朱敏瀚有感情線，喊戲連場，相當考演技。自認喊包的她說：「基本上我都『每日一喊』，昨晚瞓唔着又喊，但喊咗真係舒服晒。依家拍劇好啲嘞，有時太忙分散注意力，唔得閒傷感。第一次拍喊戲好緊張，驚喊唔出。（當時要諗啲乜？）都係諗同男拍檔嘅感情起伏。」