雷有輝開騷被禁唱太極歌

樂隊太極昨日為ViuTV節目《Chill Club》擔任嘉賓，雷有輝8月中將開騷，相隔15年後再舉行個人音樂會的他笑說：「啲兄弟唔畀我唱太極嘅歌，話要收錢喎。不過，都會有一首新版獨唱版嘅《留住我吧》。」其他成員笑說：「唱太極嘅歌要收版權費，逐首計(o架)！」講到近日疫情再爆發，可有信心如期開騷？他說：「我128%有信心開到，只要大家為我着想，注重衞生、守規矩就一定可以如期開騷。好似今次音樂會嘅主題，雨後會有彩虹出現。」他又指開騷時會有防疫措施，向觀眾派口罩及量度體溫。而太極則會在12月合體在西九龍的大草地舉行戶外騷。