李綺雯下廚隨心最叻炮製「蝦碌」

由李綺雯（o靚妹）與「廚神」紀曉華（水哥）主持的香港開電視全新節目《砂煲罌罉》，將於7月11日起逢周六晚上11時一連10集，與觀眾分享下廚秘技及心得。談到主持烹飪節目，o靚妹自言長知識：「節目內會示範正確使用廚具嘅方法，同埋分享普遍廚具嘅特性，例如易潔鑊咁，原來用嚟煮酸性食物會破壞佢層Coating o架！水哥對下廚材料好講究，好似會用新鮮嘅材料風乾、樁爛佢做成獨有嘅味素調味，真係大開眼界！」

o靚妹透露10歲出頭已開始走進廚房，但由於性格率性，下廚亦很隨意：「節目內我負責用小廚具烹調，好符合都市人嘅要求同心態。我成日都有蝦碌嘢發生，好似去超市買餸就成日買漏嘢，要用嘅時候先發現冇，我就會搵類近嘅嘢代替！例如我又講唔出菜式嘅材料份量，煮緊嗰時覺得糖、鹽唔夠，即場咪落多少少囉！」

招呼知己 減壓為「煮」

雖然隨意，但o靚妹覺得自己的「出品」絕不失禮：「我鍾意喺屋企食飯，主要係怕出面人多嘈雜，有時喺屋企煮飯招呼三五知己，賣相好可以打吓卡，大家都開心！（鍾意為男友下廚？）又冇話鍾唔鍾意嘅，夾啱時間囉！同埋我自己都要食嘛。」她自言享受下廚樂，認為是減壓良方之一：「都幾治癒，同埋煮餸可以訓練我做人有系統啲，因為每個步驟都應該有鋪排、有條理。」

紀曉華開眼界 發掘新奇「小幫手」

身為「廚神」的紀曉華（水哥）今次主持節目，坦言眼界大開，事關發現很多「新式」廚房用品：「認識咗好多奇怪嘅『小幫手』，起初會覺得『乜真係有用咩？』，直到有日見到個用嚟代替保鮮紙嘅膠蓋，驟眼以為好睇唔好用，但當試吓冚上去後又真係黐得幾實。」

水哥長年累月周遊列國，最愛於旅途中覓尋「最愛」﹕「好似有個石磨機，我喺節目內用嚟示範整芝麻糊，佢哋覺得有啲複雜，但對我嚟講冇問題兼好簡單。可能有人會覺得搬部機返嚟好重，但每個人去旅行都有自己嘅喜好，只要見到合適嘅用品就買，我成日都咁做！」