罩實出街防疫諸葛笑囝囝驚死
本港新增多宗新冠肺炎確診病例，已為兩子之母的名媛諸葛紫岐格外緊張，昨日戴上防飛沫面罩出席活動，她笑指囝囝亦勁怕死，做足防疫措施，反而老公最曳：「佢邊度危險就去邊度！」
諸葛紫岐（Marie）、陳偉琪、蔡潔與馬德鐘兒子馬在驤等，昨日在中環出席時裝展。久未露面的Marie，受訪時全程戴上面罩，她透露早前在加拿大逗留約兩個月，回港後接受14日隔離，期間做運動打發時間，因此瘦了不少。問會否擔心疫情再爆發？她說：「好擔心，家庭醫生話病毒變種，即使中過都有機會再中。（會唔會唔畀大仔返學？）佢啱啱開始放暑假，依家好少外出，活動後要全面消毒，都驚帶菌返屋企。」又笑指囝囝好怕死：「佢依家知道出街要戴Mask，相反老公就唔怕死，照常返工見客，邊度危險就去邊度，不過佢返屋企都會洗手消毒。」
陳偉琪擔心生計
至於陳偉琪因酒駕被罰停牌，由媽咪做「柴可夫」管接送，她坦言因疫情而少了搵錢機會：「都擔心生計，搵少咗好多，之前靠做活動司儀，依家少咗好多Job。本來諗住等疫情好轉，就同家人返加拿大探親，但突然多咗好幾宗確診，依家都唔敢住。（之前有冇鬆懈？）都會，依家見又嚴重番，都有提高警覺，始終家有兩老。」而貝安琪則以腳傷為由缺席，卻在社交網上載舉起腳的下廚照。
