陳山聰喊住陪產 要老婆安慰
陳山聰昨日宣布做老竇，兒子Jaco順利出世！他自爆在產房等待時已忍不住流下「爹哋淚」，要太太反過來安撫，又指幫BB剪臍帶是人生最開心的時刻。
現年43歲的陳山聰，昨日在社交網站發文宣布正式榮升爸爸，母子平安並已接回家中休息，又上載三張合照包括一家三口、山聰與BB鼻貼鼻及小手拖大手的相片，非常溫馨有愛，他留言「人生馬拉松中最美麗的畫面，感恩。#daddy希望你成為一個充滿正能量健康快樂頂天立地的男子漢」，又標籤B仔的英文名叫Jaco，由單立文夫婦取名，不忘感謝太太的付出及家人、好友與醫護人員的幫手。
鼻翼闊耳珠長
山聰昨日接受電話訪問時透露，B仔體重7磅1安士，指BB鼻翼好闊、耳珠好長，甚有「福」相。講到分娩一刻，山聰表示親自剪臍帶，但自嘲喊到變豬頭：「入院時唔緊張，但去到產房着起件衫，喺門口等嘅時候，已經忍唔住流下『爹哋淚』，未試過呢種感覺，好奇妙！入到去見到老婆瞓咗喺度，我拖住老婆隻手，佢真係冷靜到一個點，仲叫我鎮定啲唔好喊，跟住醫生好快拎BB出嚟，阿仔喊咗幾聲就即刻笑，好鍾意笑！」又指幫手剪臍帶是人生最開心的時候。
正忙於拍攝新劇《超能使者》的山聰，非常感激監製文偉鴻的配合，令他可以在醫院陪太太：「呢幾日仲有個主景要拍，佢都盡量調動，生嘅時候放咗我兩日假，之後我拍咗兩日通宵，拍完直接去醫院瞓咗一陣，就接咗兩母子返屋企。」笑言人生進入另一個新階段，家中多個小魔怪，預計將有段時間冇覺好瞓。