主演《寶貝神車手》（Baby Driver）的美國男星安索艾高（Ansel Elgort），被女網友指控於2014年性侵當時剛滿17歲的她，不顧其痛楚奪去處子之身，更叫她邀同學一起玩「多人運動」！
憑《生命中的美好缺憾》（The Fault in Our Stars）上位的安索捲入性醜聞，被一名叫Gabby的女子在社交網站撰文指控性侵，她上載掩面與安索自拍的合照作證：「我喺17歲之後幾日就被性侵，我只係17歲，而佢已經超過廿歲，佢清楚知道自己做緊乜。我唔係想借佢名氣出位，我唔理呢啲嘢。我企出嚟係因為想療傷，我知佢有對其他女仔咁做。安索艾高性侵我。我喺生日前兩日私訊佢，攞到佢嘅私人聯絡方式，我冇諗過佢會睇到我私訊，因為我只係個小朋友，係小粉絲。」
Gabby在文中憶述事發經過：「佢知道我係第一次，但冇問我想唔想停。我痛到係咁喊，唔想繼續，但佢只係講『我依家要同你特訓』。嗰刻我精神上已經離開，抽離咗自己，我好震驚，走唔到，因為我只得5呎2吋同98磅，佢令我以為性行為就係咁樣。佢知道我係咁細個，話『第日你大個女時一定好靚』。」又指安索事後向她索取裸照，又叫她安排同樣未成年的女同學一起群交，同時吩咐她不要聲張，以免影響其事業。Gabby表示因此患上創傷後遺症，需接受心理治療。
其實安索有個青梅竹馬的女友Violetta Komyshan，兩人於2012年撻着，2014年一度分手，翌年復合後拍拖至今，不時結伴行紅地氈晒恩愛，未知這段感情會否因今次事件而出現危機。此外，安索同時遭網友指控種族歧視，被指就讀紐約拉瓜迪亞演藝高中時玩諧音，向黑人同學講出侮辱黑人的名詞。他主演的重拍版《夢斷城西》（West Side Story）將於年底上映，未知會否受影響。