陳家樂氹師奶簽單勝在面皮厚

陳家樂在英皇電影《死因無可疑》中飾演初出茅廬的保險經紀，他說：「我唔知觀眾係咪察覺到，但自己從中的確睇到不一樣嘅陳家樂，有啲表情動作，連我本人都未見過，呢套戲肯定係我出道以來最重要嘅作品！」恰巧家樂確是曾經任職保險業，他說：「嗰時啱啱出道，演藝工作唔多，朋友叫我考個經紀牌，考完後真係做咗一年多保險，生意唔錯呀！因為我唔怕面懵，會主動同啲太太傾偈，可能佢哋覺得我似鄰家男孩，傾多幾次累積信任，就願意幫我簽保單。」

與湯怡默契搭夠

戲中他與多位好戲之人演對手戲，但他未感到太大壓力，為了幫助投入角色，早在開機前一年，導演袁劍偉持續與他見面，逐場戲深入剖析，他說：「導演好似教師一樣，好仔細咁問，如果遇上類似戲中角色嘅遭遇，我會有乜反應，傾傾吓好容易講出心底話！」

他與湯怡第一次飾演情侶，因為兩人太熟落，很容易有笑場、NG，但好處是好有默契，一個眼神已心領神會。

在戲中飾演不修邊幅的中年婦人林嘉欣，除了裝上假肚，還留了三個月白髮，兼配上5蚊銀般大小的隱形眼鏡，但她不覺得是犧牲：「正正就係因為呢個造型我先可以入戲。」她笑言角色最難是與導演老公第二次合作，她說：「我覺得4年前合作已經畀佢榨乾咗，所以我好驚，仲有冇嘢畀佢睇呢，我哋生活已經咁熟，我已經畀佢睇晒，同佢合作係好大壓力。」

夫妻暱稱咪亂嗌

兩人在片場沒試過意見不合，因為她清楚導演與演員的界線，她又踢爆老公「語出驚人」：「拍嘢我哋係導演同演員，佢應該叫我嘉欣或角色名，但佢竟然喺現場叫我媽媽！我即刻嚇親，成個人彈起，佢用咗屋企嘅叫法，我好抗拒呢種叫法，當聽唔到，心諗唔好再叫我，唔好再嚇我。」