祖兒生日轉字頭 阿嬌笑晒出關送驚喜

鍾欣潼（阿嬌）自與賴弘國爆離婚後，一直深居簡出，雖曾有自拍片段流出，但其實是4月時拍下的舊片段，而她除於上月底被拍得現身公司樓下後，幾乎絕迹公開場合，亦未再更新社交網。不過，面對容祖兒（Joey）踏入40歲，好姊妹「轉字頭」，當然要隆重其事，阿嬌「破例」出關，日前與蔡卓妍（阿Sa）搞驚喜派對為她慶祝，經理人霍汶希在社交網上載合照，並留言：「容祖祖，老母祝你生日快樂，希望你鍾意呢個Surprise，我哋全部都好愛你。」相中可見穿上深色衫的阿嬌消瘦不少，但狀態不俗，笑笑口心情大靚。

阿Sa立體蛋糕顯心思

阿Sa亦非常有心思，專誠將Joey數月前畫的一堆公仔圖案，實體化整成立體蛋糕送給壽星女，令Joey相當感動，並留言：「蔡卓妍係傻o架！咁都畀佢諗到呢一個蛋糕！話說我只係有一晚懶得意同佢分享我畫嘅動物，幾個月後連我都唔記得咗有呢一幕，佢竟然將佢哋一隻隻變成立體，仲加多個有底裙嘅pretty sexy，依家佢哋好似扭蛋公仔咁得意嘅動物，喺我面前出現，好開心好開心，邊有咁有心思嘅人o架！」阿Sa客氣地表示：「係因為你畫嘅畫令人一見難忘啫！」

此外，阿Sa昨日再為Joey慶生，同場還有英皇集團主席楊受成的愛兒楊政龍，他們分別在社交網上載合照，楊政龍笑指：「啊祖奶媽生日快樂，希望你開開心心，繼續騎騎呢呢！」