早估到「明湯戀」 唐詩詠：請食飯補償我

與馬國明傳了多年緋聞的「契妹」唐詩詠，連日未有就「明湯戀」作出任何表示，只在社交平台寫佛偈，引來外界揣測。昨日她現身電視城時，指大家被社交網影響太深：「呢件係開心事，唔好無風起浪，唔好用社交媒體去斷定關係，咁就太膚淺。我哋嘅友誼唔需要加裂痕上去，咁係太幼稚。（係咪祝福佢？）當然祝福，我係最開心。」她又指佛偈跟「明湯戀」無關，自言早已估到他們拍拖，只是沒有踢爆：「我哋都係睇報道先知，好為佢開心，不過（林）子善就有啲嬲，因為想佢親口講，佢只係畀咗個Emoji同講多謝。（同馬國明傳咗咁多年緋聞，依家甩難？）做兄弟冇所謂，佢要請我食飯同煲靚湯畀我飲去補償我。」