冧數馬國明5優點 湯洛雯：想一生一世！

現年33歲的湯洛雯（靚湯），日前被本報踢爆暗撻46歲「鑽石筍盤」馬國明，雙方秒速大方認愛，又甫「出Pool公仔」多謝大家愛的祝福。昨晨11時許，靚湯駕駛辣跑離開紅磡寓所，直駛將軍澳電視城準備為新劇拍外景，全黑打扮的她甫現身化妝間，即獲記者連番恭喜「破Dry」，她冧豬豬講多謝，甜笑透露與馬國明剛開始，雙方確定為合適對象才見家長。

以結婚為前提

談到其父母非常滿意「未來女婿」，豪言畀足100分之餘，更指馬國明有望超越滿分，靚湯哈哈大笑說：「佢哋好誇張！最估唔到媽咪話放心交我畀佢，咁佢對我嘅屋企人係好好，都值100分，但夾硬話要減少少嘅話，就98分，畀兩分佢做得好少少！」她指每次拍拖都以結婚為前提，單身兩年間身邊不乏追求者，但最終情歸馬國明：「了解咗一段時間覺得好啱，同普通情侶一樣會傾吓將來，一齊朝住呢個方向，咁自己都想一生一世！」對於男友大讚她性格簡單，她怕醜地5倍「回禮」，讚馬國明孝順、善良、冷靜、成熟及穩重！她說：「佢同我都好錫父母，三觀又好似，我哋都好佛系，仲一樣咁宅，哈哈！講到有啲怕醜添！佢畀到安全感我，又可以安定我心靈，表面上我係一個傻大姐，但其實好騰雞。」

冇同心穎聯絡

父親節將至，問到宣布戀情是否最佳禮物？靚湯繼續甜笑：「我都有再買禮物。（同雙方家長慶祝？）要睇吓就唔就到時間，但大家都有互買父親節禮物，加上我媽咪就嚟生日，佢都好緊張問我媽咪鍾意啲咩，其實佢每次上嚟屋企都好貼心，有買禮物、生果，令人好鍾意佢。」

講到好姊妹兼馬國明舊愛黃心穎透過媒體送祝福，靚湯突然變認真Mode：「多謝佢嘅祝福，但自從佢舊年去咗美國之後，都冇乜聯絡。（心穎無論工作、男人都畀你全部接收，驚唔驚畀人講閒話？）其實係緣分，我哋兩個都冇咁諗過。（見到心穎會尷尬？）暫時冇諗住。」