鄭裕玲鬧都冇用揈唔甩農夫
鄭裕玲（嘟嘟）、組合農夫成員陸永及C君，再度開拍遊戲節目。多年來嘟嘟仍Keep住團「火」，繼續喪鬧農夫，但愈鬧愈愛，即使近日她密密跟小鮮肉合作，到頭來仍逃不過農夫的手指罅，難怪她頹爆話「揈唔甩」二人！
嘟嘟、陸永及C君主持的遊戲節目《Do姐有問題》開拍第四輯，昨日於將軍澳電視城舉行造勢活動，嘉賓單立文、李彩華、湯盈盈、陳敏之等出席，即場試玩遊戲贏獎金。
嘟嘟受訪時笑言今次鬧農夫，比過往更激：「要出埋武器，但佢哋繼續駁嘴駁舌！」還取笑穿機師服的二人：「就算佢哋着龍袍都唔似太子！不過今輯有樣好，就係錄影錄得夠快。 」C君即「反擊」，直指嘟嘟易嬲，才會經常被「開波」：「有時提佢未到嗰個環節就嬲，都唔知佢嬲乜！」
談到嘟嘟近日經常跟小鮮肉拍住上搵錢，問農夫是否要諗計黐實對方？嘟嘟即笑言：「都揈唔甩！佢哋咪又喺度！」陸永說：「佢有佢自己嘅人生，咪畀佢出去試吓啲新嘢，試完佢又係歸番我哋！」之後嘟嘟曲線投訴農夫：「人哋好有我心，講嘢陰聲細氣。」C君再駁嘴：「可能佢對你有誤會，正如我哋頭3年都係（陰聲細氣）。」嘟嘟忍不住怒氣說：「咩呀？佢知我係和譪可親(o架)！」
單立文有機會出軌
同場的單立文自爆曾被堪輿學家批算，若然2019年冇BB，今年就會出現「小三」：「就係驚喺呢段時間，搞到我晚晚都瞓唔好。（收工去邊？）呢啲私人嘢唔答啦，哈哈！（鎖自己喺屋企？）點鎖呀？可能我倒垃圾，見到個垃圾婆呢！」提到他日前與老婆胡蓓蔚、黃智雯及男友一齊食飯，期間智雯跟男友疑似開火，單立文說：「冇吵大鑊。（催佢哋結婚？）有催過，但見佢哋相處OK。」