張致恒乜都撈 轉行做經紀
因桃色新聞搞到形象破產的藝人張致恒（Steven），連累演藝工作叫停，去年底更放下身段到酒店做廚房散工。據知，受新冠肺炎疫情影響，其酒店的散工都「摺埋」，但堅持盡男人責任孭起頭家的他，早前在社交網上載限時短片，寫上「買車放車買樓賣樓搵我啦」，疑似轉行做經紀，實行有得撈就撈。
放低以前 努力向前
Steven昨日受訪時默認做兼職經紀：「其實我有打工嘅，亦有做其他Part Time。覺得依家呢個時勢，前路發展係點都唔知，有多啲搵錢機會畀自己都好，就算唔係藝人，普通人都會搵唔同機會去搵錢，再加上嚟緊多個小朋友，要供書教學，而我個仔差唔多開始要報幼稚園，搵多啲錢都係為屋企囉。」
但他拒絕透露目前打工性質：「做緊咩工唔講喇，總之努力搵錢，Part Time乜都做吓。瞓嘅時間少咗，因為要照顧個仔同老婆，老婆又就嚟生，只係希望可以放得低以前嘅嘢，努力向前面行，做番好自己，為家庭負責任。」
「雪藏劇」重見天日
去年他曾在內地拍兩齣網劇《倩女幽魂》及《仙書奇譚》，最近終於推出，他開心說：「因為新聞影響到之前嘅工作，依家知道兩個劇反應唔錯，個人放心番先。」從未在港拍過古裝劇的他坦言愛上拍古裝劇，希望有機會可以繼續拍。