張曦雯沉迷打機 嚇走黃宗澤
型男黃宗澤與索女張曦雯首度合作拍劇已成為好友，男方大讚張曦雯是其心目中的女神，但除了對方名花有主外，亦因興趣不同而未能撻着。
無綫小生黃宗澤（Bosco）與花旦張曦雯（Kelly）於新劇《飛虎之雷霆極戰》俊男美女配搭，戲外亦老友鬼鬼。雖然首次合作，但因二人性格皆爽朗，很快已成為好友，Bosco說：「佢喺外國長大，性格好爽，我哋又一齊去英國拍外景，收工就一齊食飯、飲嘢、買嘢，就係咁Friend咗。」張曦雯笑言：「我嗰邊嘅戲份唔多，每日都係等佢收工一齊食飯、行街。其實我哋之前已經認識，只係唔熟，同埋我係由細睇佢啲劇睇到大，哈哈。」Bosco即說：「佢寸我，話我讀中學時佢仲係BB喎！」
笑Bosco要求高
飾演「校花」的Kelly被問讀書時是否很多人追？她笑言：「讀書嗰陣我唔係校花，鍾意打機同埋夾Band，好男仔頭，所以冇人追。去到學期尾終於鼓起勇起約校草去舞會，但最後都冇拍拖，做好朋友到依家。」Bosco則坦言讀書時是肥仔一名，眼見同學受女仔歡迎，才「發憤圖強」：「我肥到隻豬咁，梗係唔係校草，最尾兩年參加泳隊先瘦，所以話所有肥仔都係潛力股。」
他在Kelly「威脅」下，才承認對方是其心目中的女神：「如果揀女朋友一定要爽朗，唔好斤斤計較、小器。真心講佢性格真係好正，仲有少少Mix嘅味道，梗係我心目中嘅女神。不過佢有男朋友啦，我叫佢介紹啲朋友畀我識，但係一個都冇介紹囉。」Kelly笑言：「佢要求咁高，等我慢慢物色。」
唔急結婚
Kelly出名愛打機，卻成為二人的阻礙，Bosco笑言：「之前整親隻腳喺醫院，佢真係夠朋友，攞部遊戲機畀我解悶，但我唔鍾意打機，就係唔打機，所以撻唔着，哈哈。」Kelly與英日混血男友Brunyez皆是機迷，感情穩定，問到可有結婚計劃？她說：「以前希望廿幾歲就結婚、生仔，但依家30歲反而覺得結婚好遙遠。」至於踏入適婚之齡的Bosco坦言被朋友催婚：「可能我喺單親家庭長大，所以一向冇幸福家庭嘅畫面，阿媽又冇催，冇乜所謂啦！」