黃文意暗交「港甲星爵」:係佢養起我!

被封為無綫「最強Body」的36D咪神黃文意有個富爸爸,貴為10億千金,屢受情傷的她擇偶口味大逆轉,寧要過江龍,不要本地薑,但依然「嫌錢腥」,未有計較男伴家境和財力。原來她暗交月薪萬多元、效力港甲的「港甲星爵」Ivan Maric達半年,對男友讚不絕口:「係佢養起我至啱!」揚言他比歷任舊愛都優勝!

現年27歲、憑36D超級導彈成為無線「最強Body」的咪神黃文意,身為中文大學碩士的她有個身家逾10億的富爸爸、「LED燈大王」黃裕發。雖然後台強勁,但她從不靠父蔭,去年簽約無綫做「親生女」拍劇及主持雙線發展外,連在屯門買樓都是靠自己。

10億千金拍拖同樣愛貼地,前年被本報踢爆與年長23歲的男星唐文龍譜出「父女戀」,惟戀情維持半年無疾而終,之後她自爆被圈中人「情騙」兼劃清界線,有傳所指的是童星出身的李日昇,男方曾背她暗撻另一咪神陳偉琪。

愛過痛過,黃文意原來已有新歡,而且口味大逆轉。據知本地足球界近年傳她與一名跟漫威超英「星爵」Chris Pratt撞樣的港甲球員譜出姊弟戀,她近日亦上載兩人去沙灘及農場消遣的合照,但留言未有說明是情侶關係。

球會包住宿 教波賺外快

「港甲星爵」是現年25歲、來自歐洲塞爾維亞的球員Ivan Maric,效力球會景峰,司職後衞,有指他表現不錯,在今季賽事腰斬前,替景峰上陣10場入了4球。由於Ivan不是球星級數,收入有限,月薪約萬多元,但有教小朋友踢波賺外快,球會更有提供住宿。

黃文意昨日接受本報電話訪問,問到是否與「港甲星爵」Ivan拍拖?她承認拍拖半年,本來大纜扯唔埋,但緣於同住屯門區:「我哋完全唔識,有日出街咁啱Ivan行過兼問路,大家傾得幾開心,仲交換埋電話,傾咗個幾月就開始拍拖。」

她表示最欣賞Ivan的善良,大讚他是超級暖男:「有次我哋喺快餐店食嘢,有個食客好可憐咁冇叫嘢食,但望住我哋,佢就主動買咗份餐畀佢。又試過舊年同佢出街時,我突然唔舒服喺街狂嘔,佢幫我清理嘔吐物,仲即刻買咗件衫畀我。」

接「限奶令」收埋36D

身為10億千金,黃文意卻坦言未向男友「稟報」自己的家境,更笑言自己比他窮,不認同女尊男卑:「應該係佢養起我至啱,佢人工OK,有幾萬蚊。佢好勤力,唔好以為佢好窮!大家都知我仲係努力階段,收入真係唔算多,每次約會都係佢堅持畀晒。有次食飯我畀咗先,佢就好嬲,堅持要畀番我,佢話男仔一定要畀晒,冇理由要女仔畀。不嬲我唔講求食貴嘢,大家一齊開心嘅話,食乜都一樣開心!(見咗家長未?)冇咁快,父母知我拍拖,但我暫時冇結婚打算。」

黃文意指Ivan不太清楚她的職業,但就下了「限奶令」:「佢性格好保守,所以我同佢去沙灘時,都唔會着太性感嘅泳衣。」她對男友讚不絕口,問到是否覺得對方比歷任男友優勝?她說:「都係(口架),我覺得Ivan係最好嘅一個!(同外國人拍拖開心啲?)都係,同埋外國人唔知我背景,所以相處得好舒服。」又透露男友因疫情關係要停賽,加上思鄉情切,將離港返鄉探親兩個月:「我好唔捨得,不過有視像電話嘛!」