李施嬅分飾多角 伍詠薇踩入「金宵」：唔會影衰山聰
被喻為神劇的無綫劇集《金宵大廈》第二輯將於8月開拍，主角陳山聰、李施嬅連同貓貓「靚寶」都會齊齊壓陣，而憑劇中憶子成狂「王敏儀」一角奪得「最佳女配角」的趙希洛、「林哥仔」張彥博、「膠罐」林子善及「佳爺」黃子豪等主要人物都有得留低，新加入的據知暫有山聰的「家姐」伍詠薇，她將於其中一個單元演一個神經質角色。
故事內容貼地
監製葉鎮輝透露第二輯共有10個單元，故事圍繞貼身社會問題，當然亦是於「金宵大廈」內發生。第一輯山聰、施嬅均分飾兩角，葉鎮輝說：「佢哋今次好大挑戰，唔只飾演兩個角色咁簡單。」
山聰受訪時表示，16年前跟「家姐」伍詠薇合演《大唐雙龍傳》後便沒合作過：「情商到家姐返嚟拍劇，梗係開心啦！我同施嬅今次以愛情故事形式演繹，但唔再係阿蕭同Alex。」今次不只演兩個角色，會否壓力大？他說：「依家仲未殺到埋身，未知，要拍埋《超能使者》先，希望有半個月畀我慢慢消化吓個角色。」
16年未有合作
而伍詠薇透露自2013年《法外風雲》後，便沒拍過無綫劇：「我同山聰都有16年冇合作，同屋企人合作係開心嘅。」談及角色有點神經質，她說：「所以好期待，尤其我咁鍾意演戲，個角色好有想法。（似你？）唔好話似我，我平時玩得好癲，但演戲就好認真，個角色其實都係一個悲劇人物，依家做緊功課，唔會影衰細佬嘅！」