蘇麗珊「復牌」即玩忘年戀

蘇麗珊與圈外「ABC」男友拍拖3年，一直相當甜蜜，去年底本報拍得她與友人逛街，當日身邊不見其男友，而她一臉落寞，平日愛笑的她似滿懷心事，之後更突然去美國修讀戲劇課程，原來是失戀的關係！昨日，她接受本報專訪時被追問感情事，自爆：「我喺去美國之前已經回復咗單身，可能性格唔啱，我哋大家傾完，喺和平狀態下分開嘅。」難怪可以如此瀟灑赴美讀書，她聞言笑說：「都可以咁講嘅。」

做「教父」師妹

在美國重投校園生活，雖然課程忙碌，試過上堂踩足十幾小時，但她非常開心：「完全冇負擔，又唔使做嘢，唔似喺香港好多憂慮，嗰幾個月成個人心態放鬆晒。」她報讀的演藝學校，已故荷里活巨星、「教父」馬龍白蘭度（Marlon Brando）都讀過，每學期只收30人，只得她是香港人。她承認學費貴，使費大，每日返學放學要行足半小時，間中會有同學讓她坐順風車。提到當日暫別演藝圈，她坦言：「我都幾驚(口架)！我計咗啲錢，最多只係留到兩個學期，唔能夠太任性，依家返嚟要努力搵錢。」

老夫少妻超有趣

最近她與演員潘燦良合作網劇《老夫少妻的日常》，首次做人妻的她笑言起初都擔心欠說服力，因為天生童顏，現年27歲的她笑說：「喺美國啲同學最初估我18歲！」她表示拍劇時最難忘是同時拍電影，要早班接夜班：「好彩同燦良前輩合作，佢好犀利，乜都唔使講，一秒就入戲。」她指新劇題材得意，角色又特別：「佢做老夫，但內心好小朋友，會偷食麻辣火鍋。我外表唔似一個大人，但內心比較成熟，呢個化學作用係好笑，暫時拍咗6集，希望繼續拍落去，每集四、五分鐘，大家可以輕輕鬆鬆，等車時睇吓。」