唐詩詠刮傷陳展鵬破相擋災？
唐詩詠久休半年拍劇「係威係勢」，日前拍攝一場喝罵陳展鵬的戲份時，喪篤展鵬個頭，仲扯佢件衫，更刮到他流鼻血！自言正在行鼻運的展鵬笑說：「個鼻生得高真係好麻煩！」
陳展鵬、唐詩詠、陳山聰、林子善及劉穎鏇，日前在深水埗為新劇《超能使者》拍外景，劇情講述詩詠指罵陳展鵬，山聰則與女友劉穎鏇鬧交！拍攝期間，詩詠大聲喝罵展鵬，既篤他的頭，又扯他的衫，相當兇狠，期間手甲更刮損展鵬個鼻，即時出血！
放長假喪食發福
記者笑詩詠休息了半年中氣十足，她說：「係呀！依家好夠中氣，練好咗個肺。」講到篤到展鵬出血，「陳太」單文柔會心痛，她笑說：「對唔住阿嫂，唔覺意咋！叫『小豬比』錫番爸爸。」此外，身穿露腰上衣的她明顯發福，她說：「休息半年冇嘢做，依家跑番步又食多咗嘢，以前佢哋話我大食，依家仲大食，22吋小蠻腰已經離我而去，要收收先得！」而展鵬受訪時仍在抹血，他打趣說：「個鼻生得高真係好麻煩！我40歲行緊鼻運，可能有血光之災畀詩詠破咗，之後拍動作戲應該好安全！」
劉穎鏇山聰搞Gag
而山聰與劉穎鏇要以半鹹淡廣東話講對白，劇中山聰是內地國家武術隊導師，身懷絕技，更有超能力，他說：「啲內地口音我練咗兩個幾月，仲大挑戰過拍打戲，因為唔可以歪得太離譜，怕觀眾聽唔明。」劉穎鏇則自嘲本身都講唔正：「不過要配合山聰再講歪啲，同佢有啲Gag位。」而飾演山聰哥哥的林子善，既是健身教練又是「舞男」，他透露之後與山聰有場着吊帶褲的搞笑跳舞戲！