被拍檔食硬 何珮瑜腦力有限

藝人工作日夜顛倒，往往更是等待多於埋位拍攝，為打發時間，眾星各出奇謀。女星何珮瑜（Jeana）習慣未埋位時睇通告，了解稍後的拍攝場口，若然是輕鬆易掌控的話，便容許自己做其他事，她說：「試過同陳家樂、吳浩康、鄒文正等拍戲，佢哋會帶埋支結他去片場一齊jam歌，好開心！」不過印象最深是與吳肇軒開工，被對方大堆IQ題考起，Jeana笑說：「佢一問，大家就會七嘴八舌係咁估，過程好興奮、好嘈，但啲答案好玩嘢，又蠱惑喎！例如話城堡入面住咗個咩仙子？答案竟然係『保鮮紙』！另一條就係着鞋可以跑，着衫可以保暖，咁着咩可以識飛？答案係『雀仔』！根本就係玩食字，哈哈！但我IQ不嬲都好渣，估中機率好低。」