開工懶得湊男友陳曉華呃完易氹

挾港姐冠軍之名入行的陳曉華(Hera),憑乖乖女形象深得無綫歡心,日內亦將開拍第三部劇集《七公主》,工作量不少。猶記得Hera參選時在才藝表演大騷軟骨功,近日則苦練跆拳道!

由於筋骨柔軟,一般基本功對Hera來說簡直零難度,花了兩個月便考獲黃帶資格。受訪當日,她一輪熱身後就開始練踢腿,期間輕輕鬆鬆做出一字馬,笑言誓要考到黑帶!她自言從小運動細胞不輸蝕,求學時期是活躍分子,籃球、羽毛球及乒乓波都略懂一二,更是籃球校隊成員。

跟江嘉敏練身手

兩年前選美,她開始接觸空中瑜伽,說到學跆拳道的原因,她說:「跆拳道係之前拍劇識咗江嘉敏,知佢學開就跟佢上堂,其實我除咗筋鬆之外冇咩特別長處,加上手腳協調差,開頭好多連貫動作跟唔到,有時彈彈吓唔知做緊咩,上咗幾堂先開始上手。」

她透露在《七》劇被男性朋友背叛,由於未曾體會這些經歷,所以只能煲劇作參考:「我好少畀人背叛,就算有都係人哋講大話呃我,但只要對方請我食嘢,幾日時間就冇事。(咁咪好易追?)可以係,當然要自己鍾意對方先得,我係一見鍾情嗰隻o架!(甩拖咁耐,唔想拍拖?)唔拍啦,太忙。雖然憧憬,但呢段時間唔想,尤其拍劇會忙到冇時間做任何嘢,連瞓覺時間都冇,邊有時間維繫?」