孟希璘患免疫疾病險成世坐輪椅
早前公開「出櫃」的孟希璘，不擔心演藝工作受性取向影響，原來她「家底」相當厚，父親孟龍及伯父孟海均是圈中武將，無奈她年輕時患有免疫系統疾病，全身關節如60歲老人，醫生更預言她30歲便要坐輪椅！
孟希璘（Ball）因熱播劇集《十八年後的終極告白》而被觀眾認識，劇中飾演楊秀惠同性密友Jackie的她，2018年正式成為無綫藝人，原來她出生演藝世家，父親孟龍曾是邵氏演員，之後轉戰幕後，2002年憑電影《暗戰2》奪得金馬獎最佳動作導演；二伯父則是演員孟海，大姑媽孟秋是李小龍年代的武打明星。
關節硬 周身痛
不過，Ball並沒繼承家人向武打方面發展，原因是患上「隱疾」，她說：「我有個免疫系統嘅病，十幾歲時全身關節退化到好似60歲老人家咁，膊頭、盆骨好痛，關節組織退化到完全唔係一個正常年輕人。喺成都讀書嗰陣，我連行路都行唔到，右手揸唔到筆、刷唔到牙，朝早起身全身關節硬晒，好痛，睇咗好多醫生都冇乜進展，醫生忠告我要瞓喺床，減少活動，仲話可能30歲就要坐輪椅，我心諗同等死冇分別！後來爸爸幫我搵到黃醫師，治療後啲血好咗好多，但我啲骨已經磨損晒，依家都會痛。」
談及與KOL同性女友李寶珊公開晒愛，會否擔心角色受局限？她說：「唔怕。（想唔想做靚女角色？）我唔會介意形象，做人女朋友、化重女仔妝都冇所謂，角色層次多啲。（擔心其他人對你有另一種眼光？）現實生活我冇乜困擾，只想專注事業，緊張工作多啲。」