劉佩玥幫C君要害取暖
藝人劉佩玥（Moon）與C君前晚在將軍澳電視城出席《降魔的2.0 Ⅹ big big購物直播》，二人均表示有網購習慣，Moon說：「我乜都買，衫、褲有牌子冇牌子，實用、靚、得意嘅就買。」C君即取笑她：「我見過佢上網買樓添。」Moon大叫：「邊有呀！最多試過一次過買幾千蚊嘢。」
提到C君在《降》劇演「風獅爺」時打格仔「露肉」，他笑言：「收視即刻升咗，好多小朋友都鍾意我唔着衫，陸永兩個女睇到不斷笑，可能覺得終於有個成年人可以被佢哋恥笑。如果Moon好似我咁唔着，我諗大人細路都好喜歡。」而Moon讚C君敬業，當時拍攝只得9度：「拍完我哋即刻攞嘢幫手冚住，我負責冚住佢嘅要害，哈哈！」