阿倫露雲娜錄音室撞鬼
譚詠麟（阿倫）及鍾鎮濤（阿B）等昨日出席網上直播的寶麗金50周年記者會，他們暢談往事，期間阿倫自爆前錄音室所在的嘉利大廈當年失火，幸好他及時疏散該層及上層辦公室的人，又大爆曾在錄音室被鬼責，但笑言愈責愈紅。
昨日舉行的《寶麗金50周年半世紀的新世紀》記者會於網上直播，阿倫、阿B、湯寶如（湯記）現身撐場，而雷安娜及露雲娜則透過視像會議一同現身。
講到在寶麗金鮮為人知的往事，阿B笑言當年的錄音室有幅牆以石頭砌出來：「如果歌手唱唔到就撼頭埋牆，所以幅牆凹凹凸凸。」問到誰撼頭埋牆？阿倫笑言：「阿叻（陳百祥），所以佢做唔到歌手，做咗樂壇害蟲。」又爆前錄音室所在的嘉利大廈發生大火，自己救了錄音室同層及樓上辦公室的同事：「嗰日同阿叻錄音，我做監製，但佢一事無成唱唔到，所以我話過幾日再錄，之後我突然睇到有啲煙升上嚟，即刻疏散啲人。」
讚關淑怡不可多得
阿倫又大爆錄音室很猛鬼：「嗰度啲枱櫈好出名，有時錄到攰喺張櫈瞓着，成日有鬼責，我試過兩次，但佢哋話唔驚，仲話愈責愈紅！」露雲娜亦自爆曾撞鬼：「我試過聽到抖氣聲，但嗰啲聲唔係我。」阿倫亦透露希望可以做個寶麗金舞台劇，阿B笑言可重演錄音室的往事，湯記即打趣問阿倫想誰做「鬼」責他？他即笑言：「點知呀！」
為慶祝寶麗金50年而推出的兩首串燒歌，將會收錄在8、9月面世的紀念彩膠唱片內，11月則在會展舉行Polygram 50音樂會，到時可會邀請宣布退出樂壇的關淑怡參與？阿倫說：「如果佢肯嚟就最好，佢係不可多得嘅歌手。（有同佢聯絡？）久唔久有，但叫曾志偉啦，哈哈，其實我哋要幫嘅都已經幫晒，佢嘅心結要靠自己諗通。」
拒將娛樂扯上政治
另外，提到阿倫和阿B去年出席撐警集會，問到可擔心影響唱片及音樂會的銷情？阿倫說：「我立場得一個，尊重每位朋友，有佢哋嘅睇法同觀點，只係有啲人唔尊重我哋。（覺得啲人針對你哋？）見仁見智。」講到粉絲曾打爛其CD，問到可想藉演唱會修補與粉絲的關係？阿倫坦言：「呢個唔在於我嘅希望，我希望佢哋永遠係我fans，但唔好將娛樂扯上政治，香港係講法治嘅地方。」