李宛妲向子丹偷師學「快狠準」
現年16歲的李宛妲（Vanda）首次拍戲便入圍爭金像新人獎，她直言開心及激動！講到跟「宇宙最強」甄子丹合作，Vanda透露對方很照顧她，還讚對方拍打戲記動作超快，坦言要不斷學習。
《第39屆香港電影金像獎》今日於網上直播公布賽果，澤東新人、中德混血兒Vanda憑電影《葉問4：完結篇》入圍「最佳新演員」，面對勁敵《少年的你》易烊千璽及《新喜劇之王》鄂靖文，問到睇好哪一個？Vanda笑說：「我唔覺得邊個係我嘅勁敵！我哋都係喺同一條道路上一齊努力，大家都很優秀，都很值得我學習。（對自己有冇信心？）能夠入圍我已經非常開心，我仲有好大嘅提升空間，要不斷學習、吸收唔同嘅養分。」
談到首次拍戲便跟「宇宙最強」甄子丹拍對手戲，Vanda沒有被對方的氣場嚇窒，反而讚前輩記招式「快、狠、準」：「甄子丹老師真係對我好好！喺片場嘅時候好照顧我，很高興能夠同咁優秀嘅前輩合作，佢拍打戲嘅時候，動作唔需要記好耐就已經打得非常完美，真係非常厲害！」作為一個新人，她直言每個方向都想嘗試：「我唔會畀自己設限，希望不斷積累經驗，可以愈做愈好。」
汪詩詩被噴成面忌廉
另外，甄子丹昨日網晒一段與太太汪詩詩玩「拍拍忌廉機」的短片，詩詩當然不敵老公，大堆忌廉直潑面上！「兇手」子丹見對方成面忌廉，第一時間離開「案發」現場，旁邊有人大叫：「你今晚瞓廳呀！」他也打趣留言要睡梳化。