張景淳送花幾乎零起哄 呂慧儀：我唔係人咁品
《愛．回家》演員昨日預祝母親節，其中呂慧儀除了有囝囝送自製小手袋，又獲緋聞男友張景淳在人前獻花，但大家有默契地未有起哄，似乎不想二人緋聞再現！
藝人呂慧儀（阿蟹）、湯盈盈、劉丹、滕麗名、張景淳和單立文等，昨日在將軍澳電視城出席處境劇《愛．回家之開心速遞》慶祝母親節「報答我好媽」活動。期間周嘉洛幫劇中媽媽滕麗名按摩及扮櫈坐，而陳浚霆等人玩遊戲時又反串扮媽媽，造型搞笑。講到母親節將至，呂慧儀開心透露囝囝「蟹籽」自製了橙色手袋給她：「佢仲要我攞住個袋行catwalk畀佢睇，又叫我一定要帶個袋返工，我都覺得窩心。」
湯盈盈一枱8人啱啱好
談到活動安排男演員獻花，其中張景淳向呂慧儀獻花時，除了湯盈盈外，其他人未有特別起哄，呂慧儀笑說：「大家不嬲好錫我，同埋佢哋驚撩起我，我玩起上嚟就唔係人咁品，本來想叫張景淳扮女人，但因為陣間要開工，費事影響進度。」而湯盈盈透露星期六會提早與家人食飯慶祝：「食肆到時可以放寬至8個人，因為我屋企4個人，計埋我爸媽同老爺奶奶就啱啱好8個。」她笑言希望兩女可以學識幫她按摩：「到時可以4手按摩，嘉樂（老公錢嘉樂）就負責餵我食提子，等我好似皇帝咁。」
同場的陳浚霆相隔3年重返《愛》劇，表示前晚是其第二集出場：「尋晚我哋出去食飯提早慶祝母親節，所以一家人睇我演出。星期日我第一集出場，媽咪（顧紀筠）喺B哥哥（鍾鎮濤）屋企，仲開咗電視機一齊睇我。」他表示重返劇組是機緣巧合：「依家簽咗邵氏，樂小姐（樂易玲）問我有冇興趣再拍《愛》。」