黎諾懿光脫脫攤梳化益「姐姐」？

無綫藝員馮盈盈、黎諾懿、林盛斌與麥美恩等，昨日在將軍澳電視城出席《big big shop感謝祭》記者會，分享網購攻略。高層杜之克與余詠珊主持開鑼儀式，宣布感謝祭將於5月9日正式開始，搜羅貨品總值超過3千萬。

黎諾懿透露日前與太太食日本菜慶祝生日，盡興而歸，他笑說：「我保持飲醉嘅傳統，一起身發覺自己光脫脫披住條毛巾瞓喺梳化，咁啱工人姐姐出去放狗。（點解光脫脫？）我都唔知呀！斷咗片，沖完涼之後就光脫脫，老婆好錫我，幫我冚番條毛巾。（可能係工人姐姐幫你冚？）都有可能(口架)！等工人姐姐見識吓好嘢，哈哈！」問有否借醉「造人」，他笑說：「冇啦！如果有經驗嘅都知，飲咗酒係難啲，希望等疫情過去再努力造人。」

至於盈盈日前在網上自爆中毒，慶幸休息後已無大礙：「星期六同戴祖儀經過路邊，見到棵花好靚就走去影相，點知當晚佢暈陀陀，我就迷迷糊糊，之後作嘔又頭痛，先知掂到嘅夾竹桃有劇毒，嚴重可以致命，算係不幸中之大幸！」

唔覺鄭衍峰追求

盈盈甩拖後傳與主播鄭衍峰撻着，但她還未有意封盤，自誇追求者眾！問到追求者可有關心她？她笑說：「當然，我個市場好大，唔止一個追求者。（同鄭衍峰有冇約會？）都有同朋友食飯，大家工作上有合作，佢個人幾好。（有發展機會？）對所有可能性持開放態度。（佢係咪追你？）又唔太覺。（有冇去你新居拜訪？）我香閨好細，佢冇上過嚟。」