至尊電影《少林足球》三大揭秘
金像獎明年踏入40周年，每屆均選出一部「最佳電影」，能夠成為當中至尊，固然有一定分量，入圍名單包括張婉婷執導的《秋天的童話》、吳宇森執導的《英雄本色》、周星馳集編、導、演於一身的《少林足球》、劉偉強及麥兆輝執導的《無間道》，以及王家衛執導的《阿飛正傳》，結果由《少林足球》殺出重圍，奪30票成為「至尊金像電影」！
暗藏神秘演員！
片中「三師兄」田啟文（田雞）以及「六師弟」林子聰日前受訪，大談拍攝該片的「三大秘密」。田雞踢爆該片其實有位「神秘演員」，但因周星馳最終換了另一段「汽車維修員」馮勉恒的戲，令這位「神秘演員」慘被Cut走，原來他就是林盛斌（Bob）！田雞說：「阿Bob當時啱啱喺外國返嚟，搵咗佢拍沙地一場踢波戲，本來拍好晒OK咗，但星爺諗諗吓又Cut咗佢，改咗汽車維修員嗰段，呢部應該係林盛斌第一部戲，但冇人知。」肥仔聰補充：「其實有問過佢願唔願意留多幾個月再試，但因為佢要返電台，所以冇辦法留低。」
「六師弟」有穿崩位
肥仔聰則自爆一個「穿崩位」：「唔少人同我講睇咗呢套戲幾百次，但佢哋都睇唔到入面有個穿崩位，就係我拍嘅時候曾經因為斷威吔跌傷隻腳，所以尾場成班師兄弟衝出去踢波嗰場，我係冇跑到，因為根本跑唔到。但鏡頭一轉，我又喺個球場上，好似鬼影變幻球咁突然出現，真係要非常留心先會睇到。」
外景「翻兜」兩頭騰
周星馳拍戲出名認真，田雞與林子聰指當年電影開拍，先在珠海拍攝「大師兄」黃一飛的酒吧戲份，之後大隊飛往上海開工，但因為周星馳覺得酒吧戲份尚有發展空間，所以一聲令下，大隊又「翻兜」撲返珠海重新搭景再拍，不惜工本之餘，亦盡顯他拍戲的霸氣，每個細節執到正，笑片都拍得非常細緻認真！