投票人點講?

黎燕珊:「蕭芳芳演戲好自然,喺《女人四十》入面,每個眼神、動作都好生活化,演得非常之好。」

吳岱融:「唔止《女人四十》,佢好多戲我都鍾意,好似『林亞珍』呢個角色咁,佢演得好Cute,本身個人又好學,自然成為我呢啲後輩嘅學習對象。記得細個未入行,有時見到佢都會對我笑,銘記於心。」

黃浩然:「『影后中的影后』其實非常難揀,但我會揀前輩芳芳姐,因為佢演戲好有魅力,係一位好出色嘅演員。」

張達明:「睇佢嘅《女人四十》,我睇到流眼淚,同埋會望吓自己媽咪,亦會睇吓自己對身邊人有冇做漏咗啲乜嘢呢?好多位都令人反思,芳芳姐,好嘢!」

李佳芯:「我到依家仲好記得發哥嘅雙槍,印象非常難忘!」

姜皓文:「發哥出名親切好人,做戲出嚟嘅氣勢就係影帝中嘅影帝,當年件『Mark哥褸』不知幾Hit,好鍾意!」

劉心悠:「我細細個就睇《英雄本色》,戲中發哥嘅演技同造型一早入晒腦,真係好鍾意,冇得輸!」

黃百鳴:「當年佢演呢套戲影響力好大,令到英雄片流行一時,好多人着『Mark哥褸』模仿佢,真係紅極一時!最初搵發哥係客串,唔係咁多戲,但係發哥好聰明,去到現場睇到呢套戲勁喎,就同導演吳宇森講唔好理佢幾多檔期,發哥話『我任拍(口架)!』咁就喺現場不斷加戲,加加吓變咗主角,後來仲攞埋影帝!」