陳美齡返港隔離 自彈自唱解悶
長居日本的陳美齡，因當地疫情嚴重，早前在家人游說下返港，並已完成14日的家居隔離。她坦言被限制留家，寸步不離的孤獨感十分辛苦：「家姐買蛋糕畀我食，都係放門口，然後打電話叫我拎。我同家傭一齊住，但冇見面，佢煮好飯放低，我自己一個食。原來我好鍾意同人一齊，好唔鍾意一個人呀！」
她坦言隔離期間花4天看了3本書後覺得無所事事，故有意寫書，準備書展推出，但又提不起勁，唯一得着是讓她重拾結他自彈自唱。她又指完成隔離首日，第一時間探母親，她哽咽說：「媽咪搬咗去同細佬住，去到後，家姐叫我唔好行埋媽咪度，只係企喺門口遙遠望，真係望吓咋！我檢測過兩次，真係冇中招。（媽咪知你嚟探佢？）媽咪眼睛唔好，一定要捉住佢隻手同佢講嘢先知，所以佢唔知我嚟過，好傷心。」並指回家後，唱了3小時歌發洩才平復情緒：「我好嬲自己，又嬲呢個世界！」