6年出得兩首歌 謝文欣冇錢畀家用做人好失敗
28歲歌手謝文欣於2013年加入星夢後遭投閒置散，只被安排主持工作、劇集奀茄角色，等足5年才以「新人」姿態出首支派台歌，被網民戲謔「永遠的新人」。正當她以為終於圓夢做歌手，可惜後勁不繼，再坐冷板櫈一年，至今亦只出過兩首歌。曾定下30歲Deadline的她發現時間無多，去年約滿後毅然離巢。當時眼見比她遲入公司的菊梓喬、譚嘉儀都陸續出碟，她坦言心情難免失落：「當然有唔開心，望住個個都有歌出，但覺得自己仍需努力，好多方面都比唔上其他人。（目標做星夢一姐？）嘩！諗都冇諗過。」
多年來工作量少之又少，人工只夠養活自己，她自爆曾拿不出家用，自言「做人好失敗」：「成28歲人，有半年連家用都畀唔到屋企，對媽咪真係好愧疚，要佢成日擔心，仲要掉轉頭問番我夠唔夠錢使。我自己住要交租，平時真係慳到盡，買一次餸煮4次食，4日食一樣嘅嘢。」
跳唱手腳不協調
早前她落實加入新公司天盟娛樂，做天堂鳥、BINGO的師妹，重新出發，近日推出轉會後首支新歌《偶像傳奇》，邀來金牌監製伍樂城打造，一改以往慘情曲風，靈感則來自她的追星經歷，原來她瘋狂迷戀偶像黃凱芹：「前年我出歌嗰時好冇信心，但我聽黃凱芹嘅歌，有番啲自信，自此就好鍾意佢。上年我專程去清遠睇佢演唱會，仲膽粗粗入後台送花，佢竟然話聽過我唱歌，真係畢生難忘！」
此外，自嘲手腳不協調的她，希望向師姐BINGO學習，挑戰做跳唱歌手：「佢哋跳舞好犀利。之前同天堂鳥拍片跳舞，喺佢哋隔籬顯得我手腳勁僵硬，好滑稽。」