隔離半個月蔡卓妍出關搵「老細」

本於馬來西亞為英皇網絡劇開工的蔡卓妍，因疫情關係急急返港，並進行14日家居隔離。「疫監」結束後，她急着見的竟然不是男友石恒聰，而是一班可愛的狗狗！她上載與「老細」的合照，搞笑留言：「終於可以去媽咪屋企探我啲老細s，我啲老細s全部變成婆婆公公，除咗栗子妹（愛犬名字）仲細，其他全部都有白內障，好慘呀！點解要老(O架)？喺我心目中，佢哋永遠都係BB仔！」網民笑指她「冇人性」，只關心愛犬；又指她為狗狗起的名字全跟食物有關，包括荔枝及月餅等。