大台旅遊節目以靚女做招徠，有時仲會打孖上，由兩個女仔一齊帶觀眾周圍玩，鏡頭前啲女仔梗係搭晒膊攬晒腰好好感情咁，但有幾多Pair係真Friend呢？其中兩集由「大丸」同「風騷」做主持，年齡上「大丸」大「風騷」一截，唔知「風騷」係真天真定扮晒嘢，鏡頭前後都不停叫「大丸」做姐姐，好似好有禮貌咁，但「崩口人忌崩口碗」，「大丸」覺得被人寸緊老，全程燥晒底！
有次「風騷」Roll機期間再叫「大丸」做姐姐，「大丸」終於忍唔住嗌停機話要去洗手間，原來係拉埋導演去一邊投訴「風騷」，導演都唔知點算好，惟有好言相勸，之後兩個女仔就面左左咁完成埋個行程，氣氛尷尬！
